Nizami rayonu, Keşlə qəsəbəsi, Mətləb Ağayev küçəsinin sakinləri yollarının təmirsiz vəziyyətdə olmasından şikayətçidirlər. Bu haqda bu gün, 10 fevral tarixində Bakuplus.az Real TV-yə istinadən məlumat verir.
Birinci Qarabağ müharibəsi şəhidinin adını daşıyan bu küçənin 300-ə yaxın sakini var. Sakinlərin sözlərinə görə, yolları artıq uzun müddətdir ki, bərbad vəziyyətdədir. Burada yaşayanlar deyirlər ki, küçəni bir az da girintili-çıxıntılı edən amillərdən biri bir neçə vaxtdır quraşdırılan kanalizasiya quyularının qapaqlarıdır. Sutkanın gecə saatlarında bu yolla hərəkət etmək əsl təhlükəyə çevrilir.
Sakinlər onu da deyirlər ki, bu baxımsız yol payız-qış aylarında məktəblilərin də böyük probleminə çevrilir. Oxuduqları təhsil ocağına getmək üçün 2 ayaqqabıdan istifadə etmək onlara təhsildən yayınmaq bahasına başa gəlir. 2 il palçıqlı yolla getməkdən bezara gələn sakinlər iddia edirlər ki, müxtəlif idarələrə şikayət məktubları ünvanlasalar da, onların sözünü eşidən olmayıb.
Nizami Rayon İcra Hakimiyyətindən bildirdilər ki, sakinlərin müraciəti əsasında rayon Sukanal İdarəsi tərəfindən kanalizasiya xətlərində təmir işləri aparılıb. Hazırda “Bakıelektrikşəbəkə” müəssisəsinin Nizami rayon texniki istismar sahəsi tərəfindən ərazinin işıqlandırılması üçün yeraltı elektrik xətlərinin çəkilməsi işləri aparılır. Sözügedən işlər yekunlaşdıqdan sonra küçəyə yeni asfalt örtüyü döşənəcək.
Ərazinin işıqlandırılması ilə bağlı görülən işlər də sakinlərin müraciətləri əsasında rayonun tədbirlər planına salınıb və cari ildə icrası həyata keçirilməkdədir.
