Ötən gün Qaradağ rayonunda bəzi köhnə binaların söküləcəyi ilə bağlı məlumatlar yayılıb. Lakin burada yaşayan sakinlər evlərini tərk etməyə razı olduqlarını inkar edirlər. Bu haqda bu gün, 28 noyabr tarixində Bakuplus.az Xəzər Xəbər-ə istinadən məlumat verir.
Lökbatan qəsəbəsi, Nəriman Nərimanov və 28 May küçələrində yaşayan vətəndaşlar iddia edirlər ki, cari ilin may ayından Mənzil İstismar Sahəsindən (MİS) onlara müvafiq bildirişlər gəlir. Bildirişdə deyilir ki, evlər söküləcək, insanlar isə digər ünvana köçürüləcəklər.
Buna baxmayaraq, sakinlər hələlik heç bir şirkətlə razılığa gəlmədiklərini deyirlər. Onlar, həmçinin əlavə edirlər ki, sözügedən evlər qəzalı vəziyyətdə deyil və qəsəbə ərazisində kifayət qədər istismar müddəti bitmiş digər binalar mövcuddur.
Qaradağ Rayon İcra Hakimiyyətindən bildirilib ki, rayonda 215 köhnə ikimərtəbəli bina var. Hazırda binaların sökülməsi və kompensasiya ödənilməklə sakinlərin köçürülməsi ilə bağlı qərar verilməyib. Yəni deyilənlər həqiqəti əks etdirmir.
