Dekabrın 19-u gecə saatlarında NZS kəndində baş verən kütləvi dava zamanı öldürülən Nemət Həsənovun anası baş verənlərdən danışıb. Onun sözlərinə görə, Nemət gecə atasına zəng edərək bıçaqla yaralandığını deyib. Bu haqda bu gün, 20 dekabr tarixində Bakuplus.az Oxu.az-a istinadən məlumat verir.
“Dedi ki, “məni vurublar, gəl”. Atası qonşunu götürüb getdi”, - qadın əlavə edib.
Davanın qız üstündə olduğu iddia edilsə də, mərhumun yaxınları bu versiyanı rədd edib.
Daha öncə məlum olub ki, NZS qəsəbə sakini, 17 yaşlı Fərid Əhmədli ilə həmyaşıdı Orxan Hüseynov arasında qıza görə münaqişə yaranıb. Aralarında dava düşüb, yoldan keçənlər isə onları ayırmağa çalışıblar.
Lakin yeniyetmələr sakitləşməyərək məsələni həll etmək üçün saat 23:00 radələrində məktəbin yaxınlığında görüşməyə razılaşıblar. Görüş zamanı münaqişə yenidən davaya çevrilib və bu zaman Əhmədli Hüseynovu bıçaqlayıb. Həmin vaxt yaxınlıqda olan Xalid Nəbiyev və Nemət Həsənov Əhmədlinin qarşısını almaq istəsələr də, o, onların mədə və ürək nahiyələrinə bıçaqla xəsarət yetirib.
Nemət Həsənov xəstəxanaya çatdırılıb. Lakin həkimlərin bütün səylərinə baxmayaraq, onun həyatını xilas etmək mümkün olmayıb.
F.Əhmədli şübhəli şəxs qismində tutularaq istintaqa cəlb edilib.
