28 dekabr tarixində Leyla Əliyeva Bakıda yeni təmir olunmuş həyətin açılışında iştirak edib. Bu haqda Leyla Əliyevanın rəsmi saytında məlumat paylaşılıb.
"Bizim həyət" layihəsi çərçivəsində təmir olunmuş həyətdə Leyla Əliyeva, həmçinin kütləvi ağacəkmədə iştirak edib.
Tədbirdə həyətin kiçik sakinləri üçün Yeni il bayramı ilə əlaqədar xüsusi bayram şənliyi təşkil edilib və bayram hədiyyələri təqdim olunub.
Təmir işləri Nizami rayonu, Qara Qarayev prospekti 12, 14, 16, 18, Özbəkistan küçəsi 8, 6, Azər Manafov küçəsi 3, 5, Kamil Balakişiyev küçəsi 8a, 11, 15 ünvanlarında 1400 nəfər sakinin yaşadığı çoxmərtəbəli yaşayış binalarını əhatə edir.
Ərazidə 450 ədəd müxtəlif növ ağac və kollar əkilib, 4000 kvadrat metr ərazidə yaşıllıq zolağı salınıb.
