Bakı şəhərində “Əlibəyovların evi” kimi tanınan binanın söküləcəyi iddia edilib.
Bakuplus.az xəbər verir ki, bu barədə noyabrın əvvəlindən sosial şəbəkələrdə qeyri-rəsmi məlumatlar yayılmağa başlayıb.
Bildirilir ki, söhbət tək bu binadan getmir, onun yerləşdiyi ərazidəki bütün evlərin söküləcəyi deyilir. Əraziyə isə Təzəpir məscidi ətrafında yerləşən Nizami və Lev Tolstoy küçələri, eləcə də 150 saylı məktəbin aşağı hissəsindən Baş Prokurorluğun arxa hissəsinə qədər yerləşən evlər daxildir.
Məlumata görə, söküntünün COP29 beynəlxalq tədbirindən sonra - dekabr və ya gələn ilin yanvarında başlanılacağı və ərazidə park salınacağı qeyd edilir. Aidiyyəti orqanlar hələlik bu məlumatları təsdiq və ya təkzib etməyib.
Qeyd edək ki, “Əlibəyovların evi” 1903-cü ildə tikilib. Fasadı bir neçə il öncə təmir edilib. Binanın xarici görünüşü kimi, daxili hissəsi də memarlıq baxımından cəlbedicidir.
