Xalq rəqqası Əlibaba Abdullayevin evi bərbad vəziyyətdədir. Bu haqda bu gün, 16 fevral tarixində Bakuplus.az Real TV-yə istinadən xəbər verir.
Paytaxtın “Kubinka” adlanan ərazisində yerləşən üçmərtəbəli bina baxımsız və qəzalı vəziyyətdədir. 114 yaşı olan memarlıq abidəsində tavan yarıuçuq, taxta döşəmə çürümüş, divarlar kif basmış, otaqlar rütubət qoxan vəziyyətdədir.
Burada bir zamanlar Xalq rəqqası və xoreoqraf Əlibaba Abdullayev yaşayıb, indi isə onun ailəsi ilə yanaşı, 30 ailə yaşayır və onlar öz həyatlarının və sağlamlığının təhlükə altında olmasından narahatdırlar.
“54 ildir bu binada yaşayıram. Günü-gündən divarlar çökür, hamısı çatlaq-çatlaq. Bərk külək olanda dam sökülür. Babam burada yaşayıb, bu ölkəyə, bu respublikaya 8 qızıl medal gətirib bu insan”, - deyə rəqqasın nəvəsi Məzahir Axundov qeyd edib.
Əlibaba Abdullayevin davamçısı və qızı Elmira Abdullayeva dəfələrlə müxtəlif mədəniyyət qurumları ilə əlaqə saxladığını, onun xatirəsini yaşatmaq istədiyini və binanın təmir olunmasını xahiş etdiyini bildirib, ancaq heç kim kömək etməyib.
Mədəniyyət Nazirliyindən məsələ ilə bağlı bildiriblər ki, bina tarixi abidə sayılır, ancaq özəl mülkiyyət olduğundan nazirlik orada təmir işləri apara bilməz.
[caption id="attachment_90913" align="alignnone" width="640"]
Foto Real TV-nin rəsmi Youtube kanalı[/caption]
