Xəzər rayonu, Mərdəkan qəsəbəsində yerləşən “26-lar” xəstəxanası kimi tanınan tibb məntəqəsində 15:00-dan sonra həkimləri tapmaq müşkül məsələyə çevrilib. Bu isə, ümumiyyətlə, vətəndaşları əsas narahat edən məqamlardan biridir. Bu haqda bu gün, 22 fevral tarixində Bakuplus.az Xəzər Xəbər-ə istinadən məlumat verir.
Vətəndaşlar tibbi arayışı almaq istədikdə qarşılaşdıqları maneələr səbəbi ilə müayinəni növbəti günlərə təxirə salmaq məcburiyyətində qaldıqlarını deyirlər.
Azərbaycan Həkimləri İctimai Birliyinin sədr müavini Aydın Əliyev bəzi tibb müəssisələrinin işinin düzgün qurulmamasını belə izah edir: “İş düzgün qurulmadığına görə, tibb müəssisələrində həkimlərin işi həddindən artıq çoxdur, çatdıra bilmirlər. Həkimləri stimullaşdırmaq lazımdır”.
TƏBİB-dən isə bildirildi ki, Nazirlər Kabinetinin qərarı ilə xəstəxanalarda ancaq xəstələrin ambulator qəbulu ilə məşğul olan həkimlərin iş saatı həftəlik 36 saat olaraq müəyyən olunub. Xəzər Tibb Mərkəzinin Poliklinika şöbəsinin iş saatları da qaydaya uyğun olaraq saat 09:00-dan 15:00-a qədərdir. Sözügedən müddət ərzində vətəndaşlara tibbi xidmət göstərilir. Tibb Müəssisəsinin Təcili Tibbi Yardım şöbəsi isə təcili və təxirəsalınmaz tibbi xidmətlər üçün 7/24 fəaliyyət göstərir.
