Azərbaycanda meymunçiçəyi virusuna ilk yoluxma faktı aşkarlanıb. Səhiyyə Nazirliyi və Tibbi Ərazi Bölmələrini İdarəetmə Birliyi (TƏBİB) bu barədə birgə məlumat yayıb.
Bu, ölkə üçün əhəmiyyətli bir xəbərdir, çünki meymunçiçəyi nadir rast gəlinən və genetik olaraq daha çox heyvanlardan insana ötürülən bir virusdur.
Meymunçiçəyi virusunun Azərbaycanda ilk yoluxma halının aşkar edilməsi insanlar arasında təşvişə səbəb olub. Virusun nadir və qeyri-adi olması, xüsusən də yeni bir ölkədə aşkarlanması, əhalinin narahatlığını artırır. Bu cür hallarda insanlar təbii olaraq qorxu və qeyri-müəyyənlik yaşayır.
Bəs görəsən, meymunçiçəyi virusundan necə qorunmaq olar?
Mövzu ilə bağlı Bakuplus.az-a açıqlama verən infeksionist Mərdan Əliyevin sözlərinə görə, meymunçiçəyi virusuna görə təşvişə düşməyə ehtiyac yoxdur:
“Çünki sadəcə bir xəstə var. O da xaricdə səyahətə gedib və orada səpkili xəstə ilə təmasda olub. Düşünürəm ki, o şəxs karantinə götürülüb. Onun ailə üzvləri də nəzarətdədir. Yəqin ki, virus elə bununla da məhdudlaşacaq.
Yeni yoluxmaların olacağını düşünmürəm. Çünki bu virus sırf təmas yolu ilə yoluxan xəstəlikdir. COVID-19 kimi epidemiya törətmə potensialında olan xəstəlik deyil. Çünki hava-damcı yolu ilə ötürülmür. Yalnız sıx təmas yolu ilə yoluxur”.
Həkim qeyd edib ki, təşvişə düşməyə ehtiyac yoxdur:
“Bu virusdan qorunmaq üçün sadəcə qarşımızdakı insana fikir versək, artıq onun üzündə və əllərində səpkilərin olmasını görəcəyik. Düzdür, bütün bədəndə olur. Amma ən azından bütün bədənini görməsək də, əllərini və üzünü görürük. O zaman iri səpkilər müşahidə edəcəyik. Təmasda olmasaq artıq bizə yoluxmur. Təşvişə düşməyə də ona görə ehtiyac yoxdur”.
M.Əliyev meymunçiçəyinin simptomlarını sadalayıb:
“Xəstəliyin simptomlarına gəldikdə isə, yüksək qızdırma olur. Bütün bədən səpir, iri səpkilər müşahidə olunur. Daha sonra yaraya çevrilir. Çapığa çevrilib, sağalır. Limfa düyünlərinin böyüməsi də ola bilər. Halsızlıq, iştahasızlıq, əzələ və oynaq ağrıları müşahidə olunur.
Xəstəliyin əsas fərqləndirici əlaməti də bütün bədəndə iri səpkilərin olmasıdır. Əgər biz həmin xəstə ilə təmasda olmamışqsa, bizdə bu xəstəliyin olması ehtimalı yoxdur”.
Nəzrin Vahid
