Paytaxtın Nəsimi rayonu, Salatın Əsgərova, 121 ünvanında yerləşən tarixi bina qəzalı vəziyyətdədir. Bu haqda bu gün, 6 fevral tarixində Bakuplus.az Xəzər Xəbər-ə istinadən məlumat verir.
Sözügedən ünvanda yerləşən üçmərtəbəli 15 mənzilli binanın sakinləri hər gün təhlükə altında olduqlarını bildirirlər. 130 illik bina dağıla-dağıla gedir, ancaq heç bir qurum müdaxilə etmək istəmir.
Sakinlər bildirirlər ki, rəsmi qurumlara müraciət etsələr də, onları ancaq ev söküləndən sonra köçürəcəklərini deyirlər. O günə qədər bina da təmir olunmayacaq.
“Sakitlik olanda divarların arasının ovxalandığını eşidirik. Səs o qədər bərk gəlir ki, elə bilirik, evdə kimsə var. Səhər durub görürük ki, tavandan daşlar tökülüb pilləkənlərin üstünə. Ev uçur”, - deyə sakinlər şikayət edirlər.
Nəsimi rayon İcra Hakimiyyətindən məsələ ilə bağlı bildirilib ki, sözügedən bina söküləcək və sakinlər oradan köçürüləcəklər. Hazırda sənədləşmə işləri aparılır.
