Nəsimi rayonunda növbəti ABAD həyət təhvil verilib. Bu haqda bu gün, 22 dekabr tarixində Bakuplus.az Bakı Şəhər İcra Hakimiyyətinə istinadən xəbər verir.
Sözügedən həyət 1-ci mikrorayon, Moskva prospekti, 68, 72 saylı binaları əhatə edir və 700 sakinin istifadəsi üçün nəzərdə tutulub.
Yenidənqurma işləri çərçivəsində fasadlar və dam örtükləri təmir edilib, yağış suları axıdan yeni borular və navalçalar quraşdırılıb. Binaların giriş qapısı və pilləkən sahəsində 32 ədəd pəncərə dəyişdirilib.
Binanın həyətinə 1000 kv.m-ə yaxın asfalt, 700 kv.m-dən artıq tamet daşı vurulub, 600 kv.m qazon salınıb, yeni bordürlər qoyulub. Həmçinin həyətdə zəbt olunmuş sahələr əhalinin ümumi istifadəsinə qaytarılıb, kiçik zibil qutuları qoyulub, sahibsiz heyvanlar üçün damlar və quş yuvaları quraşdırılıb.
Bundan əlavə, həyətdə söhbətgah və oturacaqlar qoyulub, uşaq və idman meydançaları yaradılıb. Məhəllədə 100 ədəd şam ağacı və 400 müxtəlif növ mövsümi gül kolları əkilib.
Sonda işıqlandırma sistemləri və təhlükəsizlik kameraları quraşdırılıb. Avtomobillər üçün parklanma yerləri yaradılıb.
[caption id="attachment_124223" align="alignnone" width="640"]
Foto Report.az[/caption]
