Bakının Nəsimi rayonu, “Memar Əcəmi” metro stansiyasının yaxınlığında “parkovşiklər”lə Azərbaycan Yerüstü Nəqliyyat Agentliyinin (AYNA) əməkdaşları arasında dava düşüb. Bu haqda bu gün, 15 noyabr tarixində Bakuplus.az Avtosfer.az-a istinadən xəbər verir.
İddialara görə, özlərini qazi adlandıran “parkovşiklər” sözügedən ərazidə şlaqbaum quraşdıraraq həmin sahəni parkinq kimi işlədirlər. Bu səbəbdən parkinqdən istifadə edən sürücülərdən ödəniş tələb edirlər.
“Azparking”in və Azərbaycan Yerüstü Nəqliyyat Agentliyinin (AYNA) əməkdaşları əraziyə yaxınlaşaraq qanunauyğun şəkildə parkinq yerinin düzəldilməsinin və ərazidə parklanma zonalarına aid yol nişanlarının, xətlərin çəkilməsinin vacibliyini vurğulayıblar.
Qazi adından istifadə edən şəxslər bu məsələni bilərək əraziyə gəlib, aidiyyəti qurumun əməkdaşları ilə münaqişə etməyə başlayıblar. İddia olunur ki, həmin şəxslər AYNA-nın məsul nümayəndələrinə xəsarət yetiriblər, qurumun avtomobilini zədələyiblər.
Daxili İşlər Nazirliyindən (DİN) verilən məlumata əsasən, Nəsimi rayonunda, “Memar Əcəmi” metro stansiyasının yaxınlığında qanunsuz parklanma fəaliyyəti ilə bağlı təbirlər aparılır.
Məsələ ilə bağlı Nurlan Əliyev bildirib ki, hər hansı qaziyə təzyiq edilməsi iddiası mübahisəlidir, həqiqəti əks etdirmir.
[video width="1920" height="1080" mp4="https://bakuplus.az/storage/photos/2023/11/ssss1-1.mp4"][/video]
