Nəsimi rayonunun Hüseynbala Əliyev küçəsi, 115 ünvanında qurumuş ağac avtomobilin üzərinə aşıb. Bu haqda bu gün, 5 iyul tarixində Bakuplus.az Baku TV-yə istinadən məlumat verir.
Məlumata görə, sözügedən ərazidə hər an düşə biləcək daha bir neçə belə ağac var. Bu da öz növbəsində yerli sakinlər üçün ciddi təhlükə yaradır.
Maraqlısı odur ki, bir neçə ağac quruduqdan sonra müvafiq qurumlar onları sulamağa, diblərini belləməyə davam edir. Sulama nəticəsində isə qurumuş ağacların kökləri çürüyür və ağaclar qoparaq kənara aşır. Ərazidə yaşayan sakinlər həmin ağacların altından keçməyə çəkinirlər. Onlar ağacları kəsməyi xahiş edirlər.
Yaşıllaşdırma Təsərrüfatı Birliyinin baş mühəndisi Cavanşir Məmmədovun sözlərinə görə, qurum yalnız Ekologiya və Təbii Sərvətlər Nazirliyinin (ETSN) müvafiq rəyi əsasında ağacları kəsib götürə və yaxud yerini dəyişdirə bilər. Bunun üçün sakinlər birbaşa ETSN-ə müraciət etməlidirlər.
“Nəsimi rayonu, sözügedən ünvandakı qurumuş ağacların götürülməsinə dair agentliyimizə müraciət daxil olmayıb. Yerli və mərkəzi icra hakimiyyəti orqanları mütəmadi olaraq öz ərazilərində olan yaşıllıqların vəziyyəti ilə bağlı monitorinqlər keçirməli, qurumuş, xəstə ağac və kolların götürülməsinə rəy alması üçün Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinə müraciət etməlidir”, – deyə Dövlət Ekoloji Ekspertiza Agentliyinin mətbuat katibi Elnur Ağayev məsələ ilə bağlı bildirib.
