Nəsimi rayonu ərazisində, Ələddin Quliyev küçəsində bəzi evlər yol çəkilişinə görə sökülüb dağıdılıb. Ərazidə plana düşməyən evlərdə yaşayanlar üçün isə qorxunc bir vəziyyət yaranıb. Bu haqda bu gün, 31 mart tarixində Bakuplus.az ATV-yə istinadən məlumat verir.
Xarabalığı xatırladan küçənin bərbad vəziyyətdə olmasına səbəb burada 5 il əvvəl yol çəkilişi ilə əlaqədar söküntü işlərinin aparılmasıdır. Həqiqətən, həmin vaxt yol çəkilib, amma sakinlər deyirlər ki, yol qurumlar dediyi kimi tikilməyib. Yolun çəkilməsi zamanı plana düşən bəzi evlərin sahiblərinə pul verilib, sakinlər başqa yerə köçüblər. Amma bəzi evlərə ziyan dəysə də, qarşılığı ödənilməyib.
Sakinlər deyirlər ki, mövcud vəziyyətə görə narkomanlar buranı xarabalıq hesab edərək tez-tez əraziyə toplaşırlar.
Məsələ ilə bağlı 70 saylı Mənzil Kommunal İstismar Sahəsindən bildirildi ki, vaxtı ilə Azəravtoyol (AAYDA) həmin ərazidəki evlərin hamısını sökərək yerində geniş zolaqlı yol çəkməyi planlaşdırıb. Amma çəkilən yol deyildiyi kimi olmayıb. Yolun bir hissəsi çəkilsə də, digər hissədə işlər yarımçıq dayandırılıb.
AAYDA-dan isə qeyd edildi ki, Nəsimi rayonu, Ələddin Quliyev küçəsində planda olan yol tam çəkilib. Dağılmış vəziyyətdə olan mənzillərin yerləşdiyi ərazidə isə yol çəkilməsi ilə bağlı heç bir layihə yoxdur. Beləliklə, qəzalı vəziyyətdə olan sakinlərin taleyinin necə olacağı hələ də məlum deyil.
