Bakıda tıxaclarda dəqiqələrlə, hətta saatlarla qalan sürücülər avtobuslar üçün ayrılan zolaqlardan istifadə barədə məlumatsızdırlar. Bu haqda bu gün, 29 iyul tarixində Bakuplus.az Xəzər Xəbər-ə istinadən məlumat verir.
Cərimələrdən qorxan sürücülər onlara icazə verilən saatda da bu zolağa daxil olmurlar. Bu, sosial şəbəkələrdə yayılan videogörüntülərdə də əks olunub.
Bakının müxtəlif ərazilərində müəyyən vaxtlarda avtobus zolaqlarına daxil olmağa icazə verilən saatlar nişan lövhələrində qeyd olunub.
Məsələn, paytaxtın ən iri prospektlərindən biri Ziya Bünyadov prospektində avtobus zolağına saat 07:00 - 10:00-da və 17:00 - 20:00-da minik avtomobillərinə giriş qadağandır, lakin digər istənilən vaxtı həmin zolaqlardan hər kəs yararlana bilər.
Yeni qaydalara görə, avtobus zolağına təyinatı üzrə daxil olmayan nəqliyyat vasitələri İnzibati Xətalar Məcəlləsinə uyğun olaraq, 100 manat məbləğində cərimələnirlər. Yalnız məlumat lövhəsi olmayan yerlərdə, ümumiyyətlə, avtobus zolaqlarına daxil olmaq olmaz.
