Nizami rayonunda 4 fevral tarixində Vətən müharibəsi şəhidi Cavid Manafovun xatirəsi anılıb. Bu haqda Nizami Rayon İcra Hakimiyyəti xəbər verib.
Keşlə qəsəbəsində şəhidin məzarı ziyarət edilib, yaşadığı binada inşa edilmiş xatirə kompleksinin qarşısında tədbir keçirilib. Tədbirdə İcra Hakimiyyətinin rəsmiləri, şəhidin ailə üzvləri, döyüş yoldaşları, rayonun şəhid ailələri, qaziləri, 145 və 238 nömrəli tam orta məktəblərin müəllimləri, şagirdləri və ictimaiyyət nümayəndələri iştirak ediblər.
Tədbir iştirakçıları şəhidlərin xatirəsini bir dəqiqəlik sükutla yad edib, abidə kompleksinin önünə gül dəstələri düzüblər. Sonra tədbirdə şagirdlər tərəfindən vətənpərvərlik mövzusuna həsr olunan şeirləri səsləndiriblər.
Qeyd edək ki, Cavid Manafov Füzuli, Cəbrayıl, Zəngilan və Qubadlı istiqamətində gedən döyüşlərdə iştirak edib, qəhrəmancasına 7 noyabr 2020-ci il tarixində şəhid olub. O, "Vətən uğrunda", "Xocavəndin azad olunmasına görə", "Şücaətə görə" və "Cəsur döyüşçü" medalları ilə təltif edilib.
