Bakının Qala qəsəbəsinin Xaşaxuna bağları massivində yaşayan sakinlər yollarının və içməli sularının olmamasından şikayət edirlər. Bu haqda bu gün, 23 noyabr tarixində Bakuplus.az Baku TV-yə istinadən məlumat verir.
Onlar üzləşdikləri problemin həlli üçün dəfələrlə aidiyyəti qurumlara müraciət etsələr də, dərdlərinə çarə edən tapılmayıb.
Məsələ ilə bağlı Xəzər Rayon İcra Nümayəndəliyinin əməkdaşı Baləli Əliyev münasibət bildirib: “İcra Hakimiyyətinin (İH) asfalt zavodu yoxdur ki, asfalt çəksin. Bəli, müraciət edirlər ərizə ilə, müraciətləri İH “Azəravtoyola” (AAYDA) göndərir ki, gəlsinlər oraya asfalt çəksinlər. İcra Nümayəndəliyinə onlar müraciət etməyiblər. Əgər İH-yə müraciət ediblərsə, deməli İH də “Azəravtoyol”u məlumatlandırıb”.
Xəzər RİH-dən isə deyildi ki, məsələ ilə bağlı “Azəravtoyol”a müraciət olunub. Ancaq agentlikdən bildirilib ki, sözügedən ərazi onların balansında deyil.
AAYDA-nın sözçüsü Anar Nəcəfli: “Sözügedən ərazi agentliyin balansında deyil. Bu üzdən agentlik tərəfindən ora hər hansı bir xidmət göstərilmir. İH-yə müraciəti əsasında onların balansında olan və təmirə ehtiyacı olan küçə və yollarla bağlı siyahılar da daxil olmaqla agentliyin xidmət göstərdiyi və təmirə ehtiyacı olan küçə və yolların siyahısı aidiyyəti üzrə təqdim olunur. Həmin siyahılar əsasında təmirə ehtiyacı olan küçə və yollar növbəli şəkildə Dövlət İnvestisiya Proqramlarına daxil edilərək icrası AAYDA-ya həvalə edilir. Bu məsələdə agentlik qərar qəbul edə biləcək səlahiyyətə malik deyil”.
Xaşaxuna sakinlərinin su problemi ilə bağlı “Azərsu” ASC-nın sözçüsü Anar Cəbrayıllı məlumat verib: “Qala qəsəbəsinin bir hissəsində işlərimiz olub ötən müddət ərzində və hökümətin təsviri layihələrinə uyğun olaraq “Azərsu” ASC-nin sifarişi əsasında bu işlərin həyata keçirilməsi gələcək dövrlərdə davam etdiriləcək”.
