Yasamal rayonu M.Seyidov küçəsinin sakinləri yollardakı bir sıra problemdən narazıdır.
Bakuplus.az xəbər verir ki, onlar əsasən küçədə sıxlığa səbəb olan yanlış avtomobil parklanmasından şikayətçidir.
Sakinlərin sözlərinə görə, küçədə Yasamal rayon Yaşıllaşdırma İdarəsinə məxsus “vaqon ofis”lər var ki, bunların qarşısında dayanan avtomobillər yolları daha da daraldır və sıxlığa səbəb olur:
“Bura Mətbuat prospekti və Şərifzadə küçəsinə paralel küçədir. Yəni ki, iki böyük prospektin sıxlığının qarşısını alan yeganə yoldur. Ancaq burda da yolun kənarına qoyduqları bu “vaqon ofis”ləri iş yeri elan ediblər. Onun qarşısında isə insanlar gəlib avtomobillərini park edirlər. Belə yolu daraltmaq nə qədər doğrudur? İki böyük prospektdəki sıxlıqdan qaçan maşınlar burada necə bir sıxlıq yaradacaqlar? Yasamal rayon İcra Hakimiyyəti bunu görmürmü?”.
Sakinlərdən birinin sözlərinə görə, sözügedən ofisdə səhər saatlarından səs-küy başlayır və bu da onların haqlı narazılıqlarına səbəb olur.
“Burada səhərdən səs-küy, dava-dalaş başlayır və hətta yay aylarında vaqonun qarşısında sanki “çayxana” açırlar. Bununla bağlı isə dəfələrlə sakinlər narazılıqlarını bildiriblər”, - deyə qeyd olunub.
Həmçinin məsələ ilə bağlı paylaşılan görüntülərdə küçədə olan zibil qablarının da qarşısının keçilməz vəziyyətdə olduğu görülür. Belə ki, sürücülər avtomobillərini zibil konteynerlərinin qabağına park ediblər. Bu da sakinlərə həm zibil atmaqda, həm də ümumi olaraq yolda hərəkət etməkdə çətinlik yaradır.
Sevinc
