Paytaxtın Xəzər rayonu, Türkan qəsəbəsi, “Aqroprom bağları” adlanan ərazidə internet xətləri sökülüb. Bu haqda bu gün, 4 aprel tarixində Bakuplus.az Xəzər Xəbər-ə istinadən məlumat verir.
Sakinlərin iddiasına görə, 2 il əvvəl “İzone” adlı provayder qəsəbədə internet xətti çəkib, ancaq 1 ay əvvəl sakinlərin xəbəri olmadan şirkət internet xəttini söküb aparıb.
“200 manata qoşmuşdular, 18 manat da aylıq ödəniş idi. Sonra xəbər etmədən gəldilər, sökdülər, apardılar aparatı”, - deyə sakinlər şikayət edirlər.
“İzone”dan məsələ ilə bağlı bildiriblər ki, xidmətin dayandırılmasına səbəb ərazidə birbaşa optik xətlərin olmamasıdır və həyətlərdəki qurğuların sökülməsi barədə sakinlərə öncədən məlumat verilib. Kompensasiya isə ödənilməyəcək, çünki sakinlər 2 ildir internetdən istifadə edirdilər.
