Paytaxtın Yasamal rayonunda yerləşən “Tri koronı” (“Üç tac”) kimi tanınan binaların sakinləri yaxınlıqdakı gölün hazırkı vəziyyətindən narahatdırlar. Sakinlər illərdir istifadəsiz qalan ərazidə abadlaşdırma işlərinin aparılmasını tələb edirlər. Bu haqda bu gün, 11 aprel tarixində Bakuplus.az İTV-yə istinadən məlumat verir.
Həmin ərazidə yerləşən göl tərk edilmiş əraziyə çevrilib. Yaxınlıqda yaşayan 120 ailəlik binanın sakinləri ümumi vəziyyətdən narahatdırlar. Bu səbəbdən onlar gölün abadlaşdırılmasını tələb edirlər. Sakinlərin iddiasına görə, ərazidə gölü qurutmağa çalışanlar var. Məqsəd isə burada bina tikintisinə başlamaqdır.
Yasamal Rayon İcra Hakimiyyətindən (RİH) bildirdilər ki, həmin ərazi şəxsi mülkiyyətdir və bir neçə il əvvəl sahibkar orda tikinti işləri planlaşdırırdı. Ancaq sakinlər etiraz etdiyi üçün layihə dayandırılıb.
“Həmin dövrdə bu, ətrafda yaşayan sakinlərin narazılığına səbəb oldu. Yəni belə bir fikir yarandı ki, gölü doldurmaq istəyirlər. Torpaqla doldurmaq istəyirlər. Lakin bu gölü doldurmaq məqsədilə deyildi. Ərazidə tikinti işlərinə hazırlıq işləri məsələsi idi. O vaxt sakinlərin müraciətinə belə bir reaksiya olundu və aparılan layihələndirmə və tikinti işləri dayandırıldı,” - deyə Yasamal RİH-nin əməkdaşı Eyvaz Bağırov qeyd edib.
“Sadəcə burada yanaşma düzgün deyil. Çünki sakinlər hesab edirlər ki, həmin ərazi abadlaşdırılmalıdır. Amma Bakı şəhərində, ümumiyyətlə, şəhərdə görülən bütün tikinti, abadlıq, yenidənqurma işləri bildiyiniz kimi şəhərin baş planına uyğun olaraq aparılır,” - ərazidə abadlaşdırma işlərinin aparılmasından danışan RİH-nin əməkdaşı əlavə edib.
Rəsmi qurumların sözlərinə əsasən, ərazi şəxsi mülkiyyət olduğuna görə orada heç bir iş görülə bilməz. Bu isə o deməkdir ki, ərazi hələ bir müddət bu vəziyyətdə qalacaq.
