Bakının Xətai rayonunda yerləşən, 5 müxtəlif istiqamətdən gələn yolların kəsişdiyi və ölkənin ən böyük dairələrindən biri hesab olunan Ukrayna dairəsinin süni surətdə daraldıldığı bildirilir. Sürücülər iddia edir ki, maşın dayanacağını dairəyə yaxınlaşdırıblar, nəticədə dairə daralıb və nəqliyyatın hərəkətində ciddi maneələr yaranıb. Bu haqda 4 iyul tarixində ATV reportaj hazırlayıb.
Sürücülər bildirir ki, bir ay ərzində heç bir səbəb olmadan həmin ərazi bağlanıb və bu ərazidə olan parkinq dairəyə doğru sıxışdırılıb.
Məsələ ilə bağlı Xətai rayon İcra Hakimiyyətinin şöbə müdiri parkinqin dairəyə doğru sıxışdırılmasını həmin ərazidə yerləşən parkın abadlaşdırılması ilə əlaqələndirib. O qeyd edib ki, bu, müvəqqəti tədbirdir. Bir neçə gün ərzində parkinq köhnə yerinə qaytarılacaq.
Ukrayna dairəsində problem təkcə dayanacaq deyil. Ekspertlər bildirir ki, dairə nə qədər geniş olsa da, orada gün ərzində ən azı 2 dəfə tıxac olur.
Nəqliyyat üzrə ekspert Ərşad Hüseynov bildirir ki, problemin həlli üçün kompleks şəkildə dairəyə fərqli yanaşma olmalıdır. Ekspert qeyd edib ki, Ukrayna dairəsinin istiqamətlərini elə qurmaq lazımdır ki, sürücü qabaqcadan hansı istiqamətə gedəcəyini seçsin. Bununla da sürücülərin eyni nöqtədən keçməsinin qarşısı alınacaq.
[caption id="attachment_51192" align="alignnone" width="800"] Foto Atv-nin rəsmi Youtube kanalı[/caption]
