Bakıda mərkəzi istilik sistemi sıradan çıxan binada nəzərdə tutulan təmir işləri hələ də başlamayıb. Bu haqda BakuPlus.az Xəzər Xəbərə istinadən bu gün, 26 oktyabr tarixində xəbər verir.
Xətai rayonu, Məhəmməd Hadi küçəsində yerləşən bina 97-də təmir üçün gətirilmiş borular və digər avadanlıqlar yığıldığı kimi qalıb.
Sakinlər deyirlər ki, ''Azəristiliktəchizat'' ASC-nin rəhbərliyi tərəfindən binaya baxış keçirilib və işlərin ən qısa müddətdə yekunlaşdırılması ilə bağlı göstəriş verilib. Əraziyə aidiyyəti qurum tərəfindən təmir üçün lazım olan avadanlıqların gətirilməsindən bir aya yaxın müddət keçməsinə baxmayaraq, problem hələ də həllini tapmayıb.
Sakinlər evlərini isitmək üçün elektrik sobalarından istifadə etmək məcburiyyətində qalırlar.
Qurumun mətbuat katibi Elvin Basqallı bildirib ki, binanın zirzəmisindəki mövcud vəziyyət təmir işlərinin aparılmasına imkan vermir.
O əlavə edib ki, indiki vəziyyətdə sözügedən binada təmir işləri aparılsa belə, istilik sistemi bir müddətdən sonra yenidən sıradan çıxa bilər.
[caption id="attachment_76502" align="alignnone" width="640"]
Foto Xəzər Xəbərin rəsmi Youtube kanalı[/caption]
