Xətai rayonu, Zığ yolu, 36 ünvanında yerləşən 9 mərtəbəli binanın zirzəmisinə dolan su sakinləri narahat edir. Bu haqda 1 dekabr tarixində Bakuplus.az Real TV-yə istinadən xəbər verir.
Belə ki, 6 bloklu bina ümumilikdə 108 mənzildən ibarətdir. Sakinlər bildirirlər ki, bəzən zirzəmilərə qrunt suları dolur. Lakin adıçəkilən ünvandakı problem kanalizasiya borularının partlaması səbəbindəndəndir. Laborator analizlər vasitəsilə də suyun kanalizasiya borusundan sızdığı təsdiqlənib. Sakinlərin narazılığına səbəb olan bu problem köklü şəkildə həll edilmir.
Çirkab suların yaratdığı nəmişlik, qoxu və həşaratlar isə binanın xüsusilə birinci mərtəbəsində yaşayan sakinləri üçün problemdir. Mənzillərə dolan pis qoxu səbəbindən sakinlər zirzəminin qapı və pəncərələrini daim bağlı saxlamaq məcburiyyətindədirlər.
“Zığ yolu, 36 ünvanında 2 gün öncə əsas daşıyıcı olan kanalizasiya xəttində tutulma baş verib, ona görə də zirzəmiyə su yığılıb. Artıq Xətai Su Kanal İdarəsi tərəfindən həmin xəttin açılması və təmiri işləri həyata keçirilib. Növbəti mərhələdə zirzəmidə yığılmış suların kənarlaşdırılması işləri görüləcək, - “Azərsu” ASC-dən bildirilib.
