Orxan İsmayılov küçəsində şəhidlərin abidəsinin qarşısına tullantıların atılması ilə bağlı Daxili İşlər Nazirliyində araşdırma aparılıb.
Məlum olub ki, hadisəni törədən “Shacman” markalı yük avtomobilinin sürücüsü Elnur Babayevdir.
O, ilkin izahatında həmin vaxt avtomobilin yük hissəsinin qapağı nasaz olduğundan və yük yerində qalan qum qırıntılarının yolun əsas hissəsinə tökülməsinin qarşını almaq üçün qırıntıları yolun kənarına boşaltdığını bildirib. Sürücü qaranlıq olduğundan yaxınlıqda şəhidlərin xatirəsini əks etdirən fotoşəkilləri görmədiyini vurğulayıb.
Həmin şəxs barəsində inzibati tənbeh tədbiri tətbiq edilib.
13:36 - Xətaidə şəhidlərin abidəsinin qarşısı zibillənib
Xətai rayonunda şəhidlərin abidəsinin qarşısına zibil atıblar. Bu haqda bu gün, 12 aprel tarixində Bakuplus.az Baku TV-yə istinadən xəbər verir.
Hadisə rayonun Orxan İsmayılov küçəsində baş verib. Naməlum şəxs yük maşını ilə Vətən müharibəsi şəhidləri – Əli Qasımov, Fərid Əsgərov və Orxan İsmayılovun xatirəsinə həsr olunan abidənin qarşısına gələrək yerə tullantı boşaldıb və ərazini tərk edib.
Hadisə anı təhlükəsizlik kameraları ilə lenta alınsa da, maşının nömrəsini təyin etmək mümkün olmayıb.
Əraziyə boşaldılan zibili Dövlət Dəmir Yolları İdarəsinin əməkdaşları təmizləyiblər.
