Bakının Xətai rayonunda yerləşən Xocalı prospekti, Yusif Səfərov küçəsi istiqamətindəki səkiləri su basıb.
Bununla bağlı sakinlər Bakuplus.az-a şikayət ünvanlayıblar.
Sakinlərin sözlərinə görə, ötən gün yağışdan sonra Xocalı prospekti 29 ünvanında yerləşən səkilər su ilə dolub.
“Şəhərin mərkəzindəyik. Ancaq bir az yağış yağan kimi yolları, səkiləri su basır. İcra hara baxır? Aidiyyəti qurumlar məsələ ilə maraqlanmırlar. Səkilərdən keçmək mümkün deyil. Gərək maşın yoluna çıxaq. Bu da təhlükəlidir”, - deyə sakinlərdən biri bildirib.
Qeyd edək ki, bu, Xocalı prospekti ilə bağlı yeganə şikayət deyil. Həmçinin Xocalı prospekti 44 ünvanında, Türkiyə-Azərbaycan Universitetinin qarşısındakı avtobus dayanacağının ətrafında da böyük su gölməçələri yaranıb. Bu da həmin ərazidə gediş-gəlişi çətinləşdirir.
