Bakının Yasamal rayonu, Əsəd Əhmədov küçəsində yerləşən çoxmərtəbəli yaşayış binasının sakinləri 8 ildir ki, çıxarış ala bilmirlər. Bu haqda bu gün, 27 dekabr tarixində Bakuplus.az Xəzər Xəbər-ə istinadən məlumat verir.
Sakinlər şikayət edirlər ki, sənədləri olmadığına görə nə övladlarını yaxınlıqda olan məktəbə göndərə, nə də mənzilləri sata bilirlər. Onlar illərdir ki, tikinti şirkətindən müsbət cavab ala bilmədiklərini deyirlər.
Məsələ ilə bağlı MTK-dan müsbət cavab almaq mümkün olmayıb.
Dövlət Şəhərsalma və Arxitektura Komitəsindən bildirildi ki, sözügedən bina istismara yararlılıq üçün rəy ala bilməyib. Bunun üçün bina sakinləri mənzillərinə çıxarış ala bilmirlər. Amma qurumdan rəyin niyə verilmədiyinin səbəbləri barədə açıqlama verilməyib. Qeyd olundu ki, bu suala FHN cavab verə bilər.
Lakin nazirlikdən bildirildi ki, məsələ ilə bağlı Bakı Şəhər İcra Hakimiyyətinə (BŞİH) müraciət göndərilməlidir.
BŞİH-dən isə bildirdilər ki, onların, ümumiyyətlə, tikinti işləri ilə heç bir əlaqələri yoxdur.
