Suraxanı rayonunun Yeni Günəşli qəsəbəsi, D massivi, 20 saylı binanın sakinləri abad həyət arzusu ilə yaşayırlar. Sakinlər zibilə qərq olan məhəllədən, nahamar yollardan, sınıq-salxaq, hələ üstəlik qarşısında hər dəfə avtomobillərin saxlanıldığı skamyalardan və könüllərini bulandıran daha nələrdən gileylənirlər. Bu haqda bu gün, 5 avqust tarixində Bakuplus.az Real TV-yə istinadən məlumat verir.
Hələ sovet dövründə inşa edilən bu 10 mərtəbəli bina əhli saysız-hesabsız problemlərdən qurtarmağın yolunu bu məhəllənin aidiyyəti qurumlar tərəfindən abadlaşdırılmasında görür.
Çalalarla dolu, yağışlı havada ətrafa palçığın, yayda isə toz dumanının yayılmasına səbəb təmirsiz yol, uçmaq təhlükəsi ilə üz-üzə qalan talvarlar, sınıq-salxaq pilləkənlər - bunların hamısı uzun illərdir ki, yararsız vəziyyətdə qalır. Dəniz mənzərəli bu binanın yerləşdiyi ərazi təmiz havası və gözoxşayan görünüşü ilə seçilməli olsa da, binanın arxası sözün əsl mənasında zibil poliqonuna çevrilib. Zibili atanlar isə sakinlərin özləridir.
Suraxanı Rayon İcra Hakimiyyətindən (RİH) bildirilib ki, Yeni Günəşli qəsəbəsi, D massivi, 20 saylı bina Mənzil-Kommunal Təsərrüfat Birliyinin və ya bu kimi xüsusi təyinatlı birliklərin balansında deyil. Bina korporativ əsaslarla sakinlərin öz vəsaiti hesabına idarə edilir və bütün kommunal xərclər və işlər sakinlər tərəfindən qarşılanır. Bu səbəbdən RİH tərəfindən orada hər hansı bir təmir-bərpa işləri aparıla bilməz.
Lakin bütün bunlara baxmayaraq, xəstəlik mənbəyinə çevrilən binanın zibilliklərlə dolu arxası hissəsi Qəsəbə Nümayəndəliyi və Bələdiyyə əməkdaşları tərəfindən dəstək məqsədilə təmizlənib.
“Bildiyiniz kimi, bura bizim xidmət sahəmiz deyil. Ancaq ümumi rayona aid olduğu üçün, antisanitariya vəziyyətinin qarşısının alınması üçün dəfələrlə burada təmizlik işləri, abadlıq işləri aparılıb. Dəfələrlə də sakinlərə müraciət etmişik, hətta binaların girişində, blokların girişində məlumatlandırma xarakterli bildirişlər vurmuşuq. Buna baxmayaraq, sakinlər yenə də buraları zibilləməkdə davam edirlər”, – Qaraçuxur qəsəbəsi inzibati ərazi dairəsi üzrə nümayəndə Rəvan Nüsrətli öz növbəsində bildirib.
