Bu gün Nəriman Abbasov “Dana White's Contender Series" turniri çərçivəsində ilk görüşünü keçirəcək. Bu haqda 6 sentyabr tarixində Bakuplus.az məlumat verir.
Nəriman Abbasovun adıçəkilən turnirdə debütü braziliyalı İsmael Bonfimə qarşı olacaq. Növbəti görüş isə dekabr ayında gözlənilir.
"Qəbələ" İdman Klubunu təmsil edən Abbasov bildirib ki, UFC ilə 5 döyüş üçün rəsmi müqavilə imzalayıb və maksimuma nail olmaq, titul uğrunda vuruşmaq, ən yaxşı döyüşlərini göstərmək niyyətindədir.
28 yaşlı idmançı UFC kəmərini qazanmaq istədiyini deyib:
"Hazırda 31 peşəkar döyüşdən 28 qələbə və 3 məğlubiyyətim var. "AMC Fight Nights"-ın çempionuyam. 4 dəfə kəmərimi müdafiə etmişəm. “Dana White's Contender Series" turnirinə ancaq qələbə dalınca gəlmişəm və UFC kəmərini qazanıb, qardaşıma həsr etmək istəyirəm. Bu, mənə çox güc verir. UFC-də döyüşəcək ilk azərbaycanlı kimi tarix yazıram".
Abbasovun qardaşı 2020-ci ilin fevralında dəm qazından dünyasını dəyişib.
