Hüseynqulu Sarabski adına 7 saylı musiqi məktəbinin külli miqdarda mənimsəməyə görə həbsdə olan sabiq direktoru apellyasiya şikayəti verib. Bu haqda BakuPlus.az Apa-ya istinadən bu gün, 25 oktyabr tarixində xəbər verir.
Bakı Apellyasiya Məhkəməsində 1 ilə yaxın müddətdə yenidən araşdırılan sabiq direktor Mehriban Rüstəmova ilə bağlı qüvvədə olan hökm qismən dəyişdirilib.
Mehriban Rüstəmova vəzifə səlahiyyətlərindən sui-istifadə edərək, məktəbdə çalışan ayrı-ayrı müəllimlərə məxsus əməkhaqqı kartlarını qanunsuz ələ keçirib həmin kartlara köçürülmüş pul vəsaitlərini bankomatdan şəxsən çıxarmaqla, habelə müəllimlərin əməkhaqqı kartlarına köçürülmüş aylıq əməkhaqqının əhəmiyyətli hissəsini tələb edərək 910 min manat pul vəsaitini mənimsəyib.
Xidməti otağında, ona məxsus Nəsimi rayonunda yerləşən yaşayış evində və avtomobilində keçirilmiş axtarış nəticəsində rəhbərlik etdiyi musiqi məktəbinin müəllimlərinin adlarına olan 40 ədəd plastik kart, müxtəlif ölkələrin valyutalarında saxlanılan 40 min manata yaxın pul vəsaiti, musiqi məktəbinin şagirdlərinin adına olan 36 ədəd şəhadətnamə, məktəbin tarifləşmə və tabel cədvəlləri, əmr kitabı, 1 ədəd notbuk və iş üçün əhəmiyyət kəsb edən digər sənəd və əşyalar aşkar edilərək götürülüb.
M. Rüstəmova pul vəsaitlərini ələ keçirərərək mənimsəməsini özü də etiraf edib.
Toplanmış sübutlar əsasında Mehriban Rüstəmovaya Cinayət Məcəlləsinin 179.4, 308 və 313-cü maddələri ilə ittiham irəli sürülüb.
Bakı Ağır Cinayətlər Məhkəməsində araşdırılan iş üzrə M. Rüstəmova 10 il 6 ay azadlıqdan məhrum edilmişdir.
Apellyasiya məhkəməsində hakim Mirzəli Abbasovun sədrlik etdiyi hakimlər heyəti təqsirləndirilən Mehriban Rüstəmova barəsində Cinayət Məcəlləsinin 313-cü (vəzifə saxtakarlığı) maddəsi ilə verilmiş ittihamı ləğv edib.
Yekun qərara əsasən, ittiham olunan sabiq direktorun cəzası 3 ay azaldılaraq 10 il 3 aya endirilib.
Hökmün qalan hissələri dəyişdirilmədən saxlanılıb.
