Yasamal rayonu ərazisində yerləşən iki bank filiallarına yanvarın 18 və 19-da basqınlar olub. Bu haqda bu gün, 19 yanvar tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Yanvarın 18-dən etibarən Yasamal rayon mühafizə şöbəsinin əməkdaşları tərəfindən qorunan banklardan birinin Yasamal filialından Mərkəzi Mühafizə Postuna “həyəcan” siqnalı daxil olub. Banka basqın edərək xəzinədarı bıçaqla hədələyib, pul tələb edən şəxs tərksilah edilərək saxlanılıb. Həmin şəxsin paytaxt sakini Nazim Məmmədov olduğu müəyyən edilib. Saxlanılan şəxsin ətrafında araşdırmalar və zəruri istintaq tədbirləri davam etdirilir.
19 yanvar tarixində kişi Yasamal rayonu ərazisində yerləşən "Bank Respublika"nın filialına gələrək əlindəki dəmir linglə oranın işçilərini hədələyərək pul tələb edib. Quldur Baş Mühafizə İdarəsinin əməkdaşları tərəfindən tutularaq zərərsizləşdirilib.
Onun Şirvan şəhər sakini, əvvəllər məhkum olunmuş 33 yaşlı İmran Əhmədov olduğu müəyyən edilib. Tutulan şəxsin üzərindən bir ədəd qaz tapançası, bir bıçaq və istifadə etdiyi dəmir ling polis əməkdaşları tərəfindən götürülüb. Faktla bağlı Yasamal Rayon Polis İdarəsində araşdırma aparılır.
