Bakının Binəqədi rayonunda kafe sahibini bıçaqlamaqda təqsirləndirilən 56 yaşlı Ağa Məmmədovun (ad şərtidir) məhkəməsi başa çatıb.
Hadisə Biləcəri qəsəbəsində yerləşən kafelərin birində baş verib.
İttihama görə, hadisə günü Ağa evdən çıxmazdan əvvəl təxminən 600 qram araq içib, daha sonra tanışı Nüsrətin kafesinə gedib. Kafe sahibi onun sərxoş olduğunu görərək çölə çıxmasını tələb edib. Aralarında yaranan mübahisə zamanı Ağa cibindəki bıçaqla Nüsrətin qarın nahiyəsinə bir zərbə vurub.
Məhkəmədə ifadə verən Ağa əməlini qismən etiraf edib. O, Nüsrəti öldürmək niyyətinin olmadığını, onu qorxutmaq istədiyini bildirib.
Zərərçəkmiş Nüsrət isə ifadəsində Ağanın sərxoş olduğu üçün onu kafedən çıxarmağa çalışdığını, bundan sonra bıçaqlandığını deyib.
Bakı Ağır Cinayətlər Məhkəməsinin hökmü ilə Ağa Məmmədov 6 il müddətinə azadlıqdan məhrum edilib.
mənbə: demokrat.аz
