Azərbaycan Milli Xalça Muzeyində sabah, 6 iyul tarixində saat 17:00-da 92 il əvvəl Şuşada toxunmuş xalçanın təqdimatı keçiriləcək. Bu haqda bu gün, 5 iyul tarixində Report muzeyə istinadən məlumat verib.
"Xalçanı muzeyin Şuşa filialına Ağsaqqallar Şurasının sədr müavini, ilk Ombudsman, professor Elmira Süleymanova hədiyyə edib. "Ləmpə” adlı xalça 1930-cu illərdə Şuşada toxunub. Belə xalçaların ilk nümunələri Şuşada 19-cu əsrin əvvəllərində peyda olub. “Şuşa” kimi də tanınan bu xalçalar binaların və sarayların bəzədilməsi üçün istifadə olunub”, - muzeydən bildirilib.
“Azərbaycan Respublikasında xalça sənətinin qorunması və inkişafına dair 2018-2022-ci illər üçün Dövlət Proqramı” çərçivəsində son illər müxtəlif təşkilatlar, o cümlədən Heydər Əliyev Fondu, Azərbaycan Respublikasının Mədəniyyət Nazirliyi, Azərbaycanlı və xarici havadarlar, kolleksiyaçılar tərəfindən muzeyə tarixi və bədii əhəmiyyətli əşyalar bağışlanmış, xalçalar hədiyyə edilmişdir.
