Bu gün hər kəsin sevdiyi azərbaycanlı cazmen, Xalq artisti Cavan Zeynallının doğum günüdür. Bu münasibətlə cazmenlə əlaqə saxlayaraq ona bir neçə sual ünvanladıq.
Bakuplus.az sənətkarla qısa müsahibəni təqdim edir.
— Cavan müəllim, yeni yaşınızda özünüzə nə arzulayırsınız?
— Özümə daha çox konsert və çıxış arzulayıram. Daha çox səhnəyə çıxmaq istəyirəm. Mən heç vaxt pulun arxasınca qaçmamışam. Musiqi ilə məşğulam və Allah da həmişə bunun qarşılığını mənə verib.
— Geriyə baxanda həyatınızın hansı dövrünü xüsusi məhəbbətlə xatırlayırsınız?
— Mən həmişə məhəbbətlə əhatə olmuşam. Hər il mənim üçün xüsusi olub. Özümü çox xoşbəxt insan hesab edirəm. Küçədə rahat və sakit gəzə bilmirəm. İnsanlar yaxınlaşır, məni tanıyırlar, şəkil çəkdirmək istəyirlər. Ona görə də özümü dünyanın ən xoşbəxt insanı hesab edirəm.
Təəssüf ki, insanlar zaman keçdikcə yaxşılıqları unudurlar. Amma mən belə insan deyiləm. Mən heç bir yaxşılığı unutmuram. Həyatda yalnız yaxşılıqları xatırlayıram və yadda saxlayıram.
— Sizcə, enerjinizin və həyata olan sevginizin sirri nədədir?
— Mən musiqini və həyatı sevirəm. İnsan sevdiyi işlə məşğul olanda özünü xoşbəxt hiss edir. Mən də həmişə musiqinin içində olmuşam.
— Bu gün sizi uzun illərdir sevən, musiqinizi dinləyən və doğum gününüz münasibətilə təbrik edən insanlara nə demək istərdiniz?
— Mən belə insanları çox sevirəm. Sizi çox dəyərləndirirəm. Hamınızı bağrıma basıram.
Bakuplus.az saytı olaraq Cavan Zeynallını bir daha doğum günü münasibətilə ürəkdən təbrik edirik. Sənətkara uzun ömür, möhkəm cansağlığı, yaradıcılığında və karyerasında uğurlar arzulayırıq.
