28 sentyabr görkəmli Azərbaycan yazıçısı Mir Cəlal Paşayevin anım günüdür.
Mir Cəlal Əli oğlu Paşayev 26 aprel 1908-ci ildə Cənubi Azərbaycanın Ərdəbil vilayətində anadan olub. Uşaqlıq və gənclik illəri Gəncədə keçib. O, müəllimlik fəaliyyəti ilə yanaşı, ədəbiyyat və elm sahəsində də mühüm işlər görüb.
Mir Cəlal Paşayev XX əsr Azərbaycan ədəbiyyatının görkəmli nümayəndələrindən biri, yazıçı, ədəbiyyatşünas alim və pedaqoq kimi tanınıb. Ədəbi fəaliyyətə 1928-ci ildə başlayıb. "Bir gəncin manifesti", "Dirilən adam", "Açıq kitab" kimi əsərləri Azərbaycan nəsrinin seçilən nümunələri sırasında yer alır. Onun hekayə və romanlarında cəmiyyət, insan xarakteri, mənəvi dəyərlər və həyatın müxtəlif problemləri geniş əks olunub.
Mir Cəlal həm də tanınmış ədəbiyyatşünas alim olub. O, Füzulinin yaradıcılığı və Azərbaycan ədəbi məktəbləri ilə bağlı mühüm elmi tədqiqatlar aparıb. 1940-cı ildə namizədlik, 1947-ci ildə isə doktorluq dissertasiyasını müdafiə edib. Uzun illər Azərbaycan Dövlət Universitetində (indiki Bakı Dövlət Universiteti) müəllim və professor kimi çalışıb.
Mir Cəlal Paşayev 28 sentyabr 1978-ci ildə Bakıda vəfat edib. O, zəngin ədəbi və elmi irsi ilə Azərbaycan ədəbiyyatı və elminin tarixində özünəməxsus iz qoyub.
