Bakıya tətilə gələn Katya və Amid Xan bloqer cütlüyün istirahəti xoşagəlməz hadisə ilə başa çatıb.
Qadının iddiasına görə, onlar İçərişəhərdə gəzərkən ehtiyatsızlıq nəticəsində ayağı çuxura düşüb və o, yıxılıb. Gəzintisini davam etdirən qadının bir neçə saat sonra ayağında şiddətli şişkinlik və dözülməz ağrılar yaranıb.
Bundan sonra cütlük Bakı şəhəri, Abbas Səhhət küçəsi 30 ünvanında yerləşən Elmi-Tədqiqat Travmatologiya və Ortopediya İnstitutuna müraciət edib. Bloqerin sözlərinə görə, onu həkim Tariyel Əlibəyli qəbul edib.
Bloqer xəstəxanada yaşadıqlarını belə ifadə edib:
"Ayağım şişmişdi, hər addımım dözülməz ağrı ilə müşayiət olunurdu. Buna baxmayaraq, rentgen üçün məni küçədən keçərək qonşu binaya piyada getməyə məcbur etdilər. Nə əlil arabası, nə əsa, nə də hərəkət etmək üçün hər hansı yardım təklif olundu. Sınmış ayaqla piyada addımlamaq məcburiyyətində qaldım.
Daha bir şok yaradan məqam rentgen otağında baş verdi. Mən Azərbaycan dilini bilmirəm, işçi isə mənə ayağımı necə qoymalı olduğumu izah etməyə çalışırdı. Tərcümə edə biləcək həyat yoldaşımı içəri buraxmadılar. Nə tələb olunduğunu sadəcə anlamırdım. Sakitcə göstərmək və ya jestlərlə izah etmək əvəzinə, sınmış ayağımı tutub kobudcasına dartır və çevirirdilər".
Bloqerin iddiasına əsasən, ona ödənişli tibbi xidmət göstərilib və müayinədən sonra ciddi problemin olmadığı, sadəcə zədələnmə və əzilmə baş verdiyi bildirilib.
Onun sözlərinə görə, ayağına sarğı qoyulub, ağrıkəsici təyin edilib və evə buraxılıb. Bloqer bildirib ki, həkimlərin rəyinə güvənərək ayağına basıb hərəkət etməyə davam edib. Daha sonra hava limanına gedərək təyyarə ilə Rusiyaya qayıdıb. Onun iddiasına görə, uçuşdan əvvəlki gecə şiddətli ağrılar səbəbindən ağlayıb və demək olar ki, yata bilməyib.
"Səhvlərin hər yerdə ola biləcəyini və bir hadisəyə əsasən ölkənin bütün səhiyyəsi haqqında mühakimə yürütməyin doğru olmadığını anlayıram. Lakin turist güclü ağrı və şişkin ayaqla gələndə rentgen edib "sınıq yoxdur" deyirlərsə, Rusiyada isə yerdəyişmə ilə müşayiət olunan sınıq diaqnozu qoyulursa...
Biz tibbi yardım üçün ödəniş etdik və oradan bunun sıradan bir zədə olduğuna əminliklə ayrıldıq. Evə isə mən sınıq ayaqla qayıtdım. Bu səbəbdən Bakıdakı Elmi-Tədqiqat Travmatologiya və Ortopediya İnstitutuna (Abbas Səhhət küçəsi, 30) müraciətimlə bağlı şəxsi təcrübəm, təəssüf ki, məhz belə oldu.
Özünüzü qoruyun!" - rusiyalı turist bildirib.
