Bakıda Azərbaycanın Əməkdar rəssamı Ağasaleh Nurinin “Nurlu sənət dünyası” adlı fərdi sərgisi açılacaq. Bu haqda BakuPlus.az bu gün, 24 may tarixində xəbər verir.
Mayın 26-da açılacaq sərgi Heydər Əliyev Mərkəzində baş tutacaq. Sərgidə müəllifin vitraj üslubunda əsərləri, rəsm əsərləri və eskizləri nümayiş olunacaq.
Qədimdən vitraj əsərləri öz gözəlliyi və incəliyi ilə insanları daim düşündürmüş və heyran etmişdir. Ağasaleh Nuri öz üslubu, dəst-xəti ilə qədim vitraj sənətinə tamamilə yeni təmayül gətirib.
Əməkdar rəssam öz karyerasına diplom işi olan Bakı Metropoliteninin "İnşaatçılar" stansiyası üçün hazırladığı “Musiqiçilər” adlı layihəsi ilə başlayıb.
Onun əsərlərini Azərbaycan Rəssamlar İttifaqı, AMEA-nın Əlyazmalar İnstitutu, Səməd Vurğunun ev-muzeyi, Bibiheybət məscidi, Bakı şəhərindəki Alman lüteran kilsəsi və digər görkəmli binalarda görmək mümkündür.
Sərgi avqustun 28-dək davam edəcək.
