Qazi və veteranların iştirakı ilə “Zəfər tarixi” adlı xeyriyyə konserti təşkil ediləcək. Bu haqda BakuPlus.az bu gün, 25 may tarixində xəbər verir.
Gənclər və İdman Nazirliyi və Mədəniyyət Nazirliyinin dəstəyi ilə mayın 27-də saat 19:00-da Heydər Əliyev Sarayında İkinci Qarabağ Müharibəsinin qazi və veteranlarının ifasında musiqili-bədii gecə keçiriləcək.
Xeyriyyə məqsədi daşıyan tədbirdən əldə olunan vəsait YAŞAT Fonduna ianə olunacaq. Biletlərin qiyməti 10-60 manat arası dəyişir.
Konsertdə səhnədə çıxış edəcək qazi və veteranlar ixtisasca musiqiçi, aktyor, rejissor, teatrşünas, rəssam olan gənclərdir.
Gecədə, həmçinin Azərbaycan Dövlət Filarmoniyasının Xalq Çalğı Alətləri Orkestri, Dövlət Mahnı və Rəqs Ansamblı, Müdafiə Nazirliyinin tabeliyində olan Hərbi Hava Qüvvələri Orkestri, tanınmış incəsənət xadimləri, eləcə də ADMİU-nun tələbə heyəti çıxış edəcəklər.
Konsertə biletləri elektron qaydada əldə etmək mümkündür.
