Heydər Əliyev Mərkəzində xalçaların təqdimatı və xalça motivləri əsasında hazırlanan geyimlərin moda gecəsi keçiriləcək. Bu haqda BakuPlus.az bu gün, 25 may tarixində xəbər verir.
Moda gecəsi Heydər Əliyev Fondunun dəstəyi ilə baş tutacaq.
İyunun 3-də keçiriləcək təqdimat zamanı “AFFFAIR" markasının təsisçisi Rüfət İsmayılın qədim çeşniləri - “Açma-yumma”, “Qarabağ”, “Naxçıvan”, “Ovçuluq”, “Pazırıq” xalçalarının elementlərindən ruhlanaraq hazırladığı dizaynlar əsasında “Azərxalça” ASC-nin kreativ komandasının ərsəyə gətirdiyi yeni xalçalar və “Sumakh” geyim kolleksiyası nümayiş etdiriləcək.
“AFFFAIR in Carpets” adlı nümayişdə "Sumakh Haute Couture" və "Sumakh Affordable Luxury" kolleksiyasından 50-yə yaxın qeyimin defiləsi keçiriləcək. Qeyd edək ki, "Sumakh Haute Couture" bu günədək Paris və Moskvada nümayiş etdirilib. "Sumakh Affordable Luxury" kolleksiyası isə ilk dəfə məhz Bakıda təqdim olunacaq.
Azərbaycan xalçalarından, xüsusilə də Qarabağ xalçaçılıq məktəbindən ruhlanaraq ərsəyə gələn layihənin məqsədi həm də tarixi ənənələri müasir istiqamətlərdə yaşatmaqdır.
