Kiçik konsertlər təşkil edən beynəlxalq təşkilat - “Sofar”-ın Bakıda yeni tədbiri baş tutacaq. Bu haqda bu gün, 19 may tarixində Bakuplus.az layihəyə istinadən xəbər verir.
28 may tarixində təşkil olunacaq yığıncağa qeydiyyat artıq başlayıb. İştirak etmək üçün ilk öncə “Sofar”-ın rəsmi saytı vasitəsilə müraciət göndərilməlidir. Sizin elektron poçtunuza tədbir haqda məlumat məktubu gələcək. Məkan ənənəvi olaraq konsertə 36 saat qalmış seçilmiş iştirakçılar üçün açıqlanacaq. Qiymət bir nəfər üçün 15 AZN təşkil edir.
“Sofar” 2009-cu ildə Londonda Rafe Offer adlı şəxs tərəfindən yaradılıb. O, öz yaşadığı evdə 8 nəfər dostlarını toplayaraq Dave Alexander adlı musiqiçinin ifalarını dinləməyə başlayıb. Hobbi kimi keçirilən yığıncaqlar dünya miqyaslı layihəyə çevrilib.
Hazırda “Sofar” 325 şəhəri əhatə edir. Canlı musiqini həqiqətən hiss etmək istəyənlər üçün hər kəsin yaxın otura biləcəyi kiçik konsertlər təşkil olunur.
