29 avqust görkəmli tarzən, Azərbaycanın ilk Xalq artisti Qurban Pirimovun anım günüdür.
Azərbaycan musiqi tarixində özünəməxsus yeri olan ustad sənətkar 1880-ci ildə Ağdamın Abdal Gülablı kəndində anadan olub. Məşhur aşıq Valehin nəvəsi olan Qurban Pirimov 15 yaşından Sadıqcanın xeyir-duası ilə Qarabağ toylarında xanəndələri müşayiət etməyə başlayıb.
1905-ci ildə Gəncədə keçirilən toylardan birində onun ifasına heyran qalan xanəndə Cabbar Qaryağdıoğlu gənc tarzəni Bakıya dəvət edib. Bundan sonra Qurban Pirimov Cabbar Qaryağdıoğlu və Saşa Oqanezaşvili ilə birlikdə məşhur muğam üçlüyündə çıxış edib, Zaqafqaziya, Orta Asiya, Moskva, Kiyev və İranda qastrol səfərlərində olub.
1931-ci ildə Qurban Pirimov Azərbaycanda ilk dəfə Xalq artisti adına layiq görülüb. Üzeyir Hacıbəyli və Müslüm Maqomayevlə yaxın yaradıcılıq əlaqələri olan tarzən Azərbaycan professional musiqisinin və tar ifaçılığı məktəbinin inkişafında mühüm rol oynayıb.
Ustad sənətkar 29 avqust 1965-ci ildə Bakıda vəfat edib və I Fəxri xiyabanda dəfn olunub.
