Paytaxtın Sabunçu rayonunda 2 yaşlı körpəni oğurlamaqda ittiham olunan qadın hakim qarşısına çıxıb. Bu haqda BakuPlus.az APA-ya istinadən bu gün, 15 iyul tarixində xəbər verir.
Gültəkin Muradovanın cinayət işi üzrə proses ötən gün Bakı Ağır Cinayətlər Məhkəməsində hakim Əhməd Quliyevin sədrliyi ilə baş tutub.
Prosesdə təqsirləndirilən şəxsin anket məlumatları dəqiqləşdirilib. Gültəkin Muradovanın özü isə ittihamda qeyd olunanlarla razı olmadığını deyib. O bildirib ki, ittiham aktını alsa da, tanış ola bilməyib. Ona görə də məhkəmədən vaxt istəyib.
Daha sonra Gültəkin Muradovanın vəkili işlə tanış olmaq üçün hakimdən vaxt istəyib.
Növbəti proses iyulun 21-nə təyin olunub.
Ötən il dekabr ayının 29-da Sabunçu qəsəbəsində oğurlanan 2 yaşlı Məhəmməd Şıxəliyev cari il yanvarın 8-i tapılmışdır.
Hadisəni törədən Beyləqan rayon sakini Gültəkin Muradova isə həbs edilmişdir.
