Paytaxtda son günlərdə 9 irigövdəli ağac aşıb. Hava küləksiz olduğundan, ağacların quruma səbəbindən aşdığı ehtimal edilir. Bu haqda bu gün, 2 noyabr tarixində Bakuplus.az ATV-yə istinadən məlumat verir.
“Bu gün səhərdən indiki saatlara qədər 9 ədəd böyük ağac və 6 ədəd böyük budaq sınaraq düşüb. Bakı şəhər və Abşeron yaramadasının torpaq iqlimi, torpaq şəraiti belədir ki, torpağın maksimal hündürlüyü 15-20 sm, bəzi yerlərdə 50-60 sm-ə çatır. Yəni bitkilərin kök sistemi dərin qatlara işləyə bilmir. Bu da gələcəkdə iri gövdəli ağacların aşmasına səbəb olur”, - Yaşıllaşdırma Təsərrüfatı Birliyinin baş mühəndisi Cavanşir Məmmədov bildirib.
Belə olan halda vətəndaşa dəyən zərər qarşılanırmı?
“Hər hansı bir ağacın aşaraq düşməsi təbiət hadisəsidir. Bizim tərəfimizdən hər hansı bir sığorta ödənilmir”, - deyə baş mühəndis qeyd edib.
Cavanşir Məmmədovun sözlərindən belə məlum oldu ki, vətəndaşlar küləkli havalarda ağaclardan qorunmalıdırlar ki, zərər çəkən olmasın. Bu kimi hadisələrin qarşısının alınması üçün ağacların cavanlaşdırma işləri aparılır ki, onların küləyə müqaviməti artsın.
