Bakıda bir həftədir ki, mağazalarda qara çörək qıtlığı yaşanır. Vətəndaşlar bildirirlər ki, paytaxtın bəzi qəsəbə və rayonlarında yerləşən mağazalarda qara çörək tapa bilmirlər. Bu haqda bu gün, 10 oktyabr tarixində Bakupost.az-a istinadən Bakuplus.az məlumat verir.
Çörək sexlərinin çovdar unu ala bilmədikləri üçün qara çörəyin istehsalının dayandırdıqları deyilir.
Verilən məlumata görə, qara çörəyin istehsalı üçün çovdar unu, əsasən, Rusiyadan gətirilir. Lakin artıq bir həftədir ki, Rusiyadan Azərbaycana çovdar unu gətirilmir. Məsələnin nə vaxt həll olunacağı məlum deyil.
Bir neçə ay əvvəl ölkədə çörək istehsalı ilə məşğul olan müəssisələr unu limitlə aldıqlarını təsdiqləyiblər. Daha öncə ticarət obyektləri bu müəssisələrə gündə 20 kisə satırdısa, indi bu rəqəm 3 dəfə azalıb.
Hazırda Azərbaycanda çovdar unundan çörək, əsasən, iki zavodda: 1 saylı Xətai Çörək Zavodu və "Çörəkçi" zavodunda istehsal olunur.
1 saylı Xətai Çörək Zavodundan bildirilib ki, bir həftəyə yaxındır ki, çovdar unu zavod tərəfindən alınmır. Buna görə də qara çörəyin istehsalı dayandırılıb.
Məsələ ilə bağlı paytaxtdakı digər çörək zavodları ilə də əlaqə saxladıq. Bundan əlavə, Bakıxanov Çörək Zavodu, eləcə də "Nur" Çörək zavodundan bu müəssisələrin qara çörək istehsal etmədiyi bildirildi.
