“Location” klubundakı partlayışda təqsirləndirilən şəxslərə hökm oxunub. Bu haqda 6 oktyabr tarixində Report məlumat verib.
Hökmə əsasən, Rəsul Rəsulov 5 il, Orxan Səfərli 4 il müddətinə azadlıqdan məhrum ediliblər. Həmin şəxslər cəzalarını məntəqə tipli cəzaçəkmə müəssisəsində çəkəcəklər. Həmçinin digər təqsirləndirilən Ruslan Məmmədova şərti cəza verilib.
Bu ilin aprelində Səbail rayonunda yaşayış binasının birinci mərtəbəsində yerləşən “Location” gecə klubunda partlayışın baş verməsi nəticəsində 1 nəfərin ölməsi, 37 şəxsin müxtəlif dərəcəli bədən xəsarətləri alması, 14 avtomobil, 1 mənzil və 2 qeyri-yaşayış obyektinə ziyan dəyməsi faktı əsasında cinayət işi açılmışdır.
Partlayış nəticəsində gecə klubunun əməkdaşı 41 yaşlı Maya Axundova ölmüşdür.
