Bakının Nəsimi rayonunda yerləşən hotellərin birində tanış qadını öldürməyə cəhd etməkdə təqsirləndirilən şəxsin cinayət işi Bakı Ağır Cinayətlər Məhkəməsinə göndərilib. Bu haqda bu gün, 16 oktyabr tarixində Bakuplus.az Azərbaycan Respublikası Baş Prokurorluğunun mətbuat xidmətinə istinadən məlumat verir.
Hadisə bu il fevralın 16-da baş verib. 26 yaşlı Sücayət İbrahimovanın hotellərdən birinin pəncərəsindən yıxılaraq xəsarət alması faktı üzrə cinayət işi açılıb.
İstintaq zamanı 28 yaşlı Şükür Qənbərovun aralarında yaranmış mübahisə zamanı İbrahimovanı döyməsi, daha sonra onu öldürmək niyyəti ilə hotelin altıncı mərtəbəsində yerləşən otağın pəncərəsindən aşağı atması məlum olub.
Hadisə ilə bağlı Qənbərova “Qəsdən adam öldürməyə cəhd” maddəsi ilə yekun ittiham elan edilib və barəsində həbs qətimkan tədbiri seçilməklə cinayət işi baxılması üçün aidiyyəti üzrə Bakı Ağır Cinayətlər Məhkəməsinə göndərilib.
