Bakının Nəsimi rayonunun Səməd Vurğun küçəsində - Dövlət Sirkinin yaxınlığında yerləşən “Bolmart” supermarketinin parkinq ərazisi ödənişli olub. Bu haqda bu gün, 10 aprel tarixində Bakuplus.az məlumat verir.
Parkinqin girişində artıq şlaqbaum və müvafiq lövhə quraşdırılıb. Bu lövhədə yerləşdirilən məlumatlara görə, vətəndaşlar 1-2 saat saxlamağa görə 5 manat, 2 saatdan artıq saxlamağa görə isə 10 manat ödəməlidirlər. Maşını bir saatdan az müddətə tərk edən vətəndaşlar dayanacaqdan pulsuz çıxa bilərlər.
Mağaza ziyarətçilərinin sözlərinə görə, bu tədbirlər qonşu ofislərin əməkdaşlarının, eləcə də sirkə gələnlərin marketin parkinqində uzun müddət avtomobillərini saxlayıb getmələri və bu səbəbdən mağazanın müştərilərinin yer tapa bilməməsi səbəbindən həyata keçirilib. Onlar, həmçinin qeyd ediblər ki, mağazada bir saatdan çox vaxt keçirən müştərilər alış-veriş qəbzini təqdim edə və heç bir ödəniş etmədən dayanacağı tərk edə bilərlər.
