Sosial şəbəkələrdə kağız qutuların arasında gecələyən iki uşaq barədə yayılan məlumat ilə bağlı "Azərbaycan Uşaqları" İctimai Birliyinin sədri Kəmalə Ağazadə açıqlama verib. Bu haqda bu gün, 28 sentyabr tarixində APA məlumat verib.
Onun sözlərinə görə, roman qrupuna aid qaraçılardan olan bu uşaqlar Yevlax sakinləridir və dilənçiliklə məşğuldurlar. Kəmalə Ağazadə, həmçinin bildirdi ki, azyaşlıların zərərli vərdişləri var. Uşaqların anası qəyyumluqdan imtina etmir, nəticədə hazırda uşaqları sığınacağa aparmaq mümkün deyil.
“Bunlar zərərli vərdişləri olan uşaqlardır. Neçə vaxtdır, bu belə davam edir. Anası bu uşaqlardan rəsmi olaraq imtina etmir, “uşaqlar mənimdir” deyir. Bu gün bu uşaqların qəyyumu həm də dövlətdir. Bu səbəbdən uşaqların üzərində ananın qəyyumluğunun məhdudlaşdırılması üçün məhkəmə qərarı olduqdan, valideyn hüquqları məhdudlaşdırıldıqdan sonra onlar sığınacağa yerləşdiriləcəklər”, - deyə Ağazadə vurğulayıb.
