“Baku Steel Company”-nin həbsdə olan sabiq rəhbəri Rasim Məmmədovun cinayət işi ilə bağlı əmlakları üzərinə həbs qoyulub. Bu haqda BakuPlus.az Apa-ya istinadən bu gün, 15 sentyabr tarixində xəbər verir.
Həmin əmlakların sırasında Bakının Səbail rayonu, Badamdar qəsəbəsində yerləşən Bakı Oksford Məktəbi, bir zavod, bir neçə fərdi yaşayış evi və bağ evi də var. Bu əmlakların qiyməti ümumilikdə 70 milyon manat civarındadır.
Bakı Oksford Məktəbinin təsisçisi Rasim Məmmədovun həyat yoldaşı Mehriban Məmmədovadır.
Üzərinə həbs qoyulmuş əmlakların təxminən 30 milyon manat təşkil edən hissəsinin R. Məmmədovun qohumlarının adına rəsmiləşdirildiyi bildirilir.
Onlar ilk prosesdə vəkil vasitəsilə məhkəmədə vəsatət qaldıraraq müstəqil tələb irəli sürən üçüncü tərəf kimi tanınmalarını istəyiblər. Məhkəmə vəsatəti baxılmamış saxlayıb.
R. Məmmədov Cinayət Məcəlləsinin “Mənimsəmə və ya israfetmə, xüsusilə külli miqdarda ziyan vurmaqla törədildikdə”, “Xüsusilə külli miqdarda gəlir əldə etməklə yalan sahibkarlıq”, “Vəzifə səlahiyyətlərindən sui-istifadə etmə, ağır nəticələrə səbəb olduqda” və “Vəzifə saxtakarlığı” maddələri ilə ittiham olunur.
Cinayət işi Bakı Ağır Cinayətlər Məhkəməsində araşdırılır.
