Bakı Slavyan Universitetində (BSU) birinci kurs tələbələri üçün “Nicat yolu” filmi nümayiş olunub. Bu haqda BakuPlus.az universitetin mətbuat xidmətinə istinadən bu gün, 15 oktyabr tarixində xəbər verir.
Film ali təhsil müəssisəsinin məzunu, Vətən müharibəsi şəhidi Nicat Şükürlünün xatirəsinə həsr olunub.
Əvvəlcə Azərbaycan Respublikasının Dövlət Himni səsləndirilib və Vətənimizin azadlığı, ərazi bütövlüyü uğrunda canlarını qurban vermiş şəhidlərimizin əziz və müqəddəs xatirəsi bir dəqiqəlik sükutla yad edilib.
Tədbirdə təhsil ocağının rektoru və tərbiyə işləri üzrə prorektoru da çıxış ediblər.
Filmin ssenari müəllifi və rejissoru, BSU-nun Jurnalistika kafedrasının dosenti Mübariz Əhmədov filmin əsas məqsədinin Nicat Şükürlünün timsalında Azərbaycan gəncinin obrazını yaratmaq olduğunu vurğulayıb.
Ekran əsərində şəhidin ailə üzvlərinin, orta məktəb və universitet müəllimlərinin, sinif və qrup yoldaşlarının, yaxınlarının onun keçdiyi həyat yoluna işıq salması, xatirələrini bölüşməsi öz əksini tapıb.
