"Məktəbin VIII sinif şagirdi (müvafiq səbəbdən şagirdin adı qeyd olunmur) davranış qaydalarını mütəmadi olaraq pozur, şagirdlərə qarşı qeyri-etik ifadələr işlədir, dərs prosesi zamanı aqressiv davranışlar edir və sinif yoldaşlarına fiziki təzyiq göstərir. Digər şagirdlərin valideynləri həmin uşağın davranışı ilə bağlı məktəb rəhbərliyinə rəsmi müraciət ünvanlayıblar".
Bu barədə Bakuplus.az-a Bakı şəhəri, Nərimanov rayonu 212 nömrəli məktəbdən bildiriblər.
Qeyd edilib ki, həmin şagirdlə məktəb rəhbərliyi, məktəbin psixoloqu tərəfindən profilaktik söhbət aparılıb, müvafiq tövsiyələr verilib və dəstək tədbirləri görülüb: "Şagirdin valideyni dəfələrlə məktəbə dəvət edilərək övladının uyğunsuz davranışları ilə bağlı ona xəbərdarlıq olunmasına baxmayaraq, müsbət nəticə əldə edilməyib. Məktəbin psixoloqu şagirddə davranış pozuntusu olması ilə bağlı rəy verib. Elm və Təhsil Nazirliyinin Uşaq Müdafiəsi İdarəsinin əməkdaşları uşağın aidiyyəti üzrə həkim müayinəsindən keçirilməsini tövsiyə etsələr də, valideyn bununla razılaşmayıb. Həmçinin valideynə övladının xüsusi təhsilə cəlb olunması üçün Psixoloji-tibbi-pedaqoji komissiyaya müraciət etməsi tövsiyə edilsə da, bundan da imtina olunub. Şagirdin davranışları ilə bağlı hüquq-mühafizə orqanlarının aidiyyəti nümayəndələrinə də məlumat verilib. Məktəb rəhbərliyi tərəfindən məsələ nəzarətə götürülüb, müvafiq qurumlarla birgə tədbirlərin görülməsi yönündə işlər aparılır".
***
11:13
"Bakı şəhəri, Nərimanov rayonun 212 nömrəli məktəbin 8-ci sinif şagirdi (müvafiq səbəbdən şagirdin adı qeyd olunmur) hər gün dərs prosesini kobud şəkildə pozur, stolların üstünə çıxır, dərs vaxtı salto vurur".
Bu haqda Bakuplus.az-a övladları həmin təhsil müəssisəsində təhsil alan valideynlər məlumat veriblər.
Onlar bildiriblər ki, aqressivliyi ilə xüsusi diqqət çəkən, ciddi problemlər yaradan şagird məktəbdə söyüşlər söyür, qızlara təhqiramiz sözlər deyir, hətta şagirdləri döyür də.
Şikayətçilər bu iddiadadırlar ki, bu uşaq islaholunmzadır və psixoloji problemləri var.
20-dən çox valideyn bu şagirdlə bağlı məktubla müvafiq qurumlara müraciət etsələr də, hələ ki ortada ciddi nəticə yoxdur.
İddia edilir ki, Təhsil Nazirliyi məktəbə psixoloq göndərib, psixoloq 20 gün bu şagirdlə müəyyən söhbətlər edəndən sonra işini bitmiş sayıb.
Məsələ ilə bağlı Bakı Baş Təhsil İdarəsinə sorğu göndərilib.
