Bakının Binəqədi rayonunda qardaşını qətlə yetirməkdə təqsirləndirilən Amin Nurinin cinayət işi üzrə məhkəmə hazırlıq iclası keçirilib.
Oxu.az xəbər verir ki, cinayət işinin ilk baxış iclası noyabrın 12-nə təyin olunub.
Hadisə 2025-ci il iyulun 3-də səhər saatlarında Binəqədi rayonunda baş verib. 1996-cı il təvəllüdlü Aslan Elgün oğlu Nuri yaşadığı evdə qətlə yetirilib. Qardaşı, 1991-ci il təvəllüdlü Amin Nuri hadisədən dərhal sonra polis şöbəsinə gələrək qardaşını öldürdüyünü etiraf edib və könüllü təslim olub.
Məlumata görə, qətl mülk bölgüsü zəminində yaranan mübahisə nəticəsində baş verib. Aslan Nuri körpəsinin gözü qarşısında amansızlıqla qətlə yetirilib. Hadisədən sonra Amin Nuri qucağında qardaşının qana bulaşmış körpəsini uşağın anasına verərək, qardaşını öldürdüyünü bildirib və polisə gedəcəyini deyib.
Təqsirləndirilən Amin Nuri müharibə iştirakçısı və zabit olub. Onun barəsində Cinayət Məcəlləsinin 120.2.4-cü (xüsusi amansızlıqla adam öldürmə), 120.2.9-cu (köməksiz vəziyyətdə olan şəxsi öldürmə) və 157.1-ci (mənzil toxunulmazlığını pozma) maddələri ilə ittiham irəli sürülüb.
